INGURUKO GAILURRAK

XOXOTE ALTUERA: 912m. KOORDENADAK: 43º12'03,50''N 2º17'07,50''W :: 30T 558057 4783467 Mendi xumea den arren, Izarraitzen oso bisitatua den tontorra da, bertatik ikuspegi paregabeaz gozatzeko aukera bait daukagu. Xoxoteko aterpetik oso gertu dago eta San Inazioren estatua ere parez-pare dauka. Xoxoteko puntatik iparreruntz Azketako lepoa topatuko dugu, borda baten ondoan elurzulo bat ikusiko dugularik. Hemen neguko elurra bildu eta mantentzen zuten, Azpeitira eta Zestoara jeisten zutelarik ondoren. Garraioa idiek bultzaturiko gurdiekin egiten zuten eta lana errazteko harrizko galtzada bat eraiki zuten, Zestoatik igotzen zena eta gaur egun ere erabiltzen dena. Elurzuloa

ERLO ALTUERA: 1026m. KOORDENADAK: 43º12'27,47''N 2º16'44,88''W :: 30T 558561 4784211
	Erlo mendia Izarraitz mendilerroko tontorrik garaiena da. Mila metro eskas dituen arren, itsasotik oso gertu kokatua dago, eta honek desnibel handia ematen dio inguruko bailaratatik igo ezkero. Mendi honen gailurrean gurutze handi bat topatuko dugu (Erloko gurutzea, 1022m.), baina punturik garaienera igotzeko apur bat aurrera egin beharko dugu aristatik, beste gurutze txiki batetara heldu arte. Hemen topatuko dugu Erloko benetako tontorra eta balkoi honek eskeintzen duen ikuspegi paregabea. Eguna garbi-garbia denean Euskal Herriko kosta ia osorik ikusiko dugu, Ipar-ekialderuntz Landatako kostaldea ere begiztatuko dugularik. Hego-mendebaldera begiratuta durangaldeko mendi harkaitztsuak ikusiko ditugu, eta Europako Pikoak ere bai, lainorik ez dagoen egunetan. Ekialdera begira jartzen bagara Aiako harriak, Larrun eta Pirinioak ikusiko ditugu, eta hegoalderaka giratzen bagara Aralar, Aizkorri eta Urbasako mendilerroak. Puntu honetatik mendebaldera abiatzen bagara Eskortako tontorrera iritsiko gara (1004m.), bertan antena handi bat dagoelarik.

KAKUTA ALTUERA: 924m. KOORDENADAK: 43º12'02,62''N 2º18'04,76''W :: 30T 556765 4783429

Tontor hau Azkoitiko lurretan dago kokatuta, Zamalekuko lepoak Xoxote menditik bereizten duelarik. Gailurrean gurutze handi bat dago eta bertatik Iraurgiko bailara osoa azalduko zaigu begien aurrean, bista ederra eskainiz. Gailur honetara heltzeko Aittolako aparkalekutik abiatu gaitezke (Madariagako gaina), bidea nahiko laua eta atsegina bait da, haurrekin egiteko oso egokia. Azken malda igotzeari ekin baina lehen Izkitturriko iturrian ur tragoxka bat hartzeko aukera edukiko dugu, baita apur bat lehenago dagoen txabolan mokadutxo bat egitekoa.